Rúmlega þreföldun á framlögum til Samtakana 78 á kjörtímabilinu

Mannréttindi hinseginfólks hafa ávallt verið Vinstri-grænum ofarlega í huga sem og mannréttindi fólks í víðum skilningi. Það hefur verið okkar mál að styðja og styrkja fjölbreytileika samfélagsins í hvívetna. Samningur Reykjavíkurborgar við Samtökin 78 er dæmi um verkefni sem Vinstri græn hafa lagt ríka áherslu á á yfirstandandi kjörtímabili í Reykjavík. Fyrst var samningur endurnýjaður til þriggja ára árið 2015 og voru framlög borgarinnar tvöfölduð í þeim samningi. Samningurinn snéri að þjónustu og ráðgjöf við hinsegin fólk, fræðslu fyrir starfsfólk borgarinnar, sem og hinseginfræðslu í skólum og frístundamiðstöðvum borgarinnar. Í upphafi árs 2018 var bætt í samnigninn og framlög því rúmlega þrefölduð á kjörtímabilinu. Áfram var tryggð sú mikilvæga þjónusta sem áður hafði verið samið um en auk þess var rekstur hinsegin félagsmiðstöðvar fest í sessi. Sá samningur markaði þau tímamót að á þeim tíma lagði Reykjavíkurborg meira til reksturs Samtakanna 78 en ríkissjóður Íslands en það framlag hefur nú hækkað í kjölfarið, sem betur fer. Það skiptir máli hverjir stjórna, Vinstri græn gefa ekki afslátt af mannréttindum.

Deila:
  • Print
  • Facebook
  • Twitter
  • StumbleUpon

Leave a Comment

Filed under Blogg

Hamish og hænurnar- elliheimili fyrir leikskólabörn?

Ég hef verið að fylgjast með þáttum á Channel 4 í Bretlandi þar sem fylgst er með 4 ára leikskólabörnum sem “flytja inn” í þjónustuíbúðir fyrir aldraða. Þættirnir “Old peoples home for four year olds” eru ekki bara góð skemmtun heldur segja þeir frá áhugaverðu verkefni. Verkefnið fólst í reglulegri samveru fjögurra ára leikskólabarna við eldri íbúa í þjónustuíbúðakjarna fyrir aldraða.

Samverustundirnar voru undir umsjón íþróttakennara, iðjuþjálfa og öldrunarlæknis. Færni fólksins var metin í upphafi og lok verkefisins og árangurinn var ótvíræður. Einnig víkkaði verkefnið út sjóndeildarhring barnana sem fengu að kynnast reynslu og þekkingu þeirra sem eldri voru. Mikið er talað um mikilvægi samveru kynslóðanna og mörg óformleg verkefni í gagni. Til dæmis man ég eftir því að leikskóli dóttur minnar fór reglulega að syngja fyrir “gamla fólkið” í nágrenninu.

Er ekki lag að þróa verkefni sem snúa að aukinni samveru kynslóðanna áfram?  Hvað þarf til? Sennilega myndi pólitískur vilji, formleg ákvörðun um verkefni og fjármagn í utanumahld duga ansi langt. Er ekki bara um að gera að prófa þetta?

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Blogg

Reykjavík gegn ofbeldi: Hvað er annars þessi mannréttindaskrifstofa að gera?

Það þarf ekki að fylgjast lengi með umræðu um borgarmál til að heyra einhvern býsnast yfir því að innan stjórnkerfis Reykavíkur sé starfrækt mannréttindaskrifstofa. Talað er um bruðl og gæluverkefni sem borgarbúar væru betur komnir án. Margir telja að rekstur mannréttindaskrifstofu geti varla talist til grunnþjónustu borgarinnar og vinsæl hagræðingarleið að leggja til að henni verði lokað, og mannréttindaráð lagt niður í leiðinni.

Sannleikurinn er allt annar. Mannréttindaskrifstofa Reykjavíkurborgar hefur  umsjón með verkefnum sem við getum öll verið sammála um að séu gríðarlega mikilvæg fyrir alla borgarbúa.  Ekki síst aðgerðir til að uppræta ofbeldi gegn konum og börnum.

Baráttan gegn ofbeldi

Barátta gegn ofbeldi, sérstaklega kynbundnu ofbeldi, hefur verið í brennidepli á þessu kjörtímabili og höfum við Vinstri græn beitt okkur fyrir því að hrinda af stað stórum verkefnum á sviði ofbeldisvarna síðan við mynduðum meirihluta með Samfylkingu, Bjartri framtíð og Pírötum árið 2014. Eitt af þeim verkefnum sem við erum stoltust af er opnun Bjarkarhlíðar þar sem þolendum ofbeldis er veittur mikilvægur stuðningur og ráðgjöf. Um tilraunaverkefni til þriggja ára er að ræða og mikilvægt að tryggja áframhaldandi fjármagn og stuðning til þessa mikilvæga verkefnis. Festum Bjarkarhlíð í sessi og eflum starfsemina í samræmi við aukna þörf fyrir þjónustu.

Ofbeldisvarnarnefnd var sett á laggirnar 2015 til þess að vera ráðgefandi á sviði ofbeldismála, leggja til aðgerðir gegn ofbeldi og stuðla að upplýstri umræðu í samfélaginu. Sama ár hóf Reykjavíkurborg samstarf við Lögregluna á Höfuðborgarsvæðiu um nýtt verklag í heimilisofbeldismálum. Markmiðið með verkefninu Saman gegn ofbeldi sem oft er kennt við „Suðurnesjamódelið“ er að bæta allt verklag við vinnslu  heimilisofbeldismála, veita þolendum og gerendum viðeigandi stuðning og bæta stöðu barna sem búa við heimilisofbeldi. Á þeim tíma sem verkefnið hefur verið starfrækt hefur náðst mikilvægur árangur við að ná til þolenda og veita þeim nauðsynlegan stuðning og eftirfylgd.

#Metoo

Við getum líka verið ánægð með þau skref sem stigin hafa verið til þess að rjúfa þögnina sem umlykur ofbeldi og leyfir því að viðgangast í samfélaginu. Mikilvægasta dæmið um mátt aukinnar umræðu um þessi mál er #MeToo byltingin. Í upphafi árs samþykkti Borgarstjórn 12 tillögur um viðbrögð við kynbundinni og kynferðislegri áreitni og kynbundu ofbeldi. Aðgerðunum er ætlað að útrýma kynbundinni-, kynferðislegri áreitni og kynbundnu ofbeldi í starfsumhverfi borgarinnar.

Stórsókn gegn samfélagsvanda

Þessi verkefni, og fjölmörg önnur, sem snúa að baráttu gegn ofbeldi, ekki síst kynbundnu ofbeldi og áreiti, eru eitt af mikilvægustu verkefnum Mannréttindaskrifstofu Reykjavíkurborgar sem samræmir aðgerðir og fylgir þeim eftir. Í stað þess að gera lítið úr störfum Mannréttindaskrifstofunnar eða tala um að loka henni til að ná fram einhverjum óskilgreindum „sparnaði“ ættum við að sameinast um að efla hana enn frekar til að sinna fjölmörgum mikilvægum verkefnum sem snúa að því að allir borgarbúar geti lifað með reisn og að mannréttindi allra séu tryggð.

Við viljum vera frjáls undan hvers kyns oki og ofbeldi. Við eigum aldrei að gefa afslátt af réttindum jaðarsettra hópa í samfélaginu. Vinstri græn munu halda áfram að berjast gegn hvers kyns ofbeldi. Þannig sköpum við Reykavík sem er fyrir okkur öll.

Greinin birtist fyrst á Stundinni

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar

Vinstri græn borg fyrir fólk á öllum aldri

Við Vinstri græn viljum að Reykjavík sé aldursvæn borg þar sem fólk á öllum aldursskeiðum getur lifað góðu og gefandi lífi. Það er okkar sýn að eldri borgarar eigi að ráða sér sjálfir og öll aðstoð skuli taka mið af óskum og þörfum hvers og eins.

Hlustum á eldra fólk

Það er mikilvægt að við virðum reynslu, skoðanir og sjálfsákvörðunarrétt eldra fólks. Við verðum að stuðla að því að allt eldra fólk geti verið virkir þátttakendur í samfélaginu. Það gerum við með því að huga að ólíkum aðgengisþörfum og gera eldri borgurum kleift að rækta fjölskyldu- og vinatengsl, með þátttöku í fjölbreyttu félags- og menningarlífi.

Vinstri græn vilja efla samvinnu við aðstandendur, hagsmunasamtök og notendur þjónustu. Öldungaráð borgarinnar, sem tók til starfa á kjörtímabilinu er mikilvægt skref í þá átt.

Við í VG leggjum áherslu á raunhæf skref til að mæta fjölbreyttum þörfum eldra fólks:

Menningar og lýðheilsukort aldraðra: Á þessu kjörtímabili höfum við í VG beitt okkur fyrir því að borgin bjóði upp á menningar- og lýðheilsukort fyrir aldraða, til að efla hreyfingu og félagsstarf. Nú veitir kortið ókeypis í sund, söfn borgarinnar og bókasöfn, auk verulegs afsláttar í strætó. Við viljum stórauka þá þjónustu sem kortið veitir aðgang að.

Fleiri hjúkrunar og dagvalarrými: Í samvinnu við ríkið viljum við tryggja nægt framboð af hjúkrunar- og dagdvalarrýmum fyrir eldra fólk í borginni.

Eflum heimaþjónustu og heimahjúkrun: Mikilvægt er að tryggja fjármagn frá ríkinu til að efla almenna heimahjúkrun og koma á fót sérhæfðri þjónustu, svo sem við heilabilaða og líknarmeðferð i heimahúsi.

Endurhæfing í heimahúsi: Ljúka verður innleiðingu endurhæfingar i heimahúsi í öllum hverfum. Bæta þarf sjúkra- og iðjuþjálfum ásamt næringarráðgjöfum við þann hóp fagfólks sem annast þjónustu við aldraða.

Nýtum velferðartækni: Ný tækifæri liggja á sviði velferðartækni og í rafrænum heimaþjónustukerfum.

Rjúfum félagslega einangrun: Á þessu kjörtímabili höfum við stutt aðgerðir sem stuðla að samveru kynslóðanna. Efla þarf verkefni á borð við að háskólanemum sé boðið upp á íbúðir í þjónustuíbúðakjörnum eldri borgara.

Allskonar eldra fólk: Þarfir eldri borgara eru allskonar, við þurfm að tryggja jafnan aðgang fátækra eldri borgara, innflytjenda og hinsegin fólks að þjónustu, stuðningi og ráðgjöf á vegum borgarinnar.

Það er forgangsmál okkar að bæta þjónustu við alla óháð efnahag. Það gerum við best með öflugri og fjölbreyttni þjónustu sem mætir þörfum fólks og rekin er fyrir fé úr sameiginlegum sjóðum.

Greinin birtist fyrst á lifdu.nuna.is

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar

Aukin samvinna ríkis og sveitarfélaga í öldrunarþjónustu – Allra hagur!

Aukin samvinna ríkis og sveitarfélaga í öldrunarþjónustu – allra hagur!

Reykjavíkurborg samþykkti á dögunum nýja stefnu í málefnum eldri borgara til ársins 2022. Þar er kveðið á um nauðsyn þess að efla samstarf við ríkið í þessum mikilvæga málaflokki meðal annars með því að fjölga hjúkrunarrýmum. Þessi áform borgarinnar ríma vel við stjórnarsáttmála ríkisstjórnarinnar þar sem boðuð er stórsókn í uppbyggingu hjúkrunarrýma. Skortur hefur verið á hjúkrunarrýmum í alltof langan tíma og nú er svo komið að biðtími eftir hjúkrunarrýmum er óásættanlega langur. Bara á höfuðborgarsvæðinu vantar um 130 rými til þess að uppfylla þörf fyrir þjónustu. Stjórnvöld þurfa að bregðast hratt og vel við þessu ákalli. Það skiptir ekki aðeins máli fyrir lífsgæði aldraðra, heldur hefur fjölgun hjúkrunarrýma áhrif á heilbrigðiskerfið allt. Skort á legurýmum á Landspítala má að stórum hluta skýra með því að alltof margir eldri borgarar fá ekki viðeigandi þjónustu, þ.e. pláss á hjúkrunarheimili. Fjölgun hjúkrunarrýma hefur auk þess þau áhrif að heilbrigðisþjónusta verður markvissari og Landspítala, heilsugæslu og öðrum heilbrigðisstofnunum er gert kleift að sinna öllum þeim brýnu verkefnum sem fyrir liggja enn betur en nú er raunin.

Fjölgun hjúkrunarrýma

Í fjármálaáætlun ríkisstjórnarinnar er tekið á þessum vanda með afgerandi hætti. Hjúkrunarrýmum verður fjölgað á landinu öllu um 300 frá fjármálaætlun síðastliðins árs auk þess sem dagdvalarrýmum verður fjölgað um allt land. Uppbygging er þegar hafin á nýju hjúkrunarheimili við Sléttuveg í Reykjavík með um 100 rýmum en þar verður auk þess byggð dagdeild með um 30 dagdvalarrýmum. Þegar eldri borgarar þurfa á meiri stuðningi að halda, en hægt er að veita í heimahúsum, getur dagdvöl nýst til að rjúfa félagslega einangrun og styðja við áframhaldandi sjálfstæða búsetu. Mikilvægt er að tryggja aðgengi eldra fólks að dagdvalarrýmum og þá þarf að þróa frekari sérhæfingu í dagdvölum, sem geta komið til móts við mismunandi þarfir aldraðra.

Fjölbreyttur hópur

Þegar þjónusta við aldraða er annars vegar þarf að hafa í huga að aldraðir eru fjölbreyttur hópur. Engin ein lausn hentar öllum og því þarf að tryggja að í boði séu úrræði sem henta hverjum og einum einstaklingi. Hluti af því er að veita fólki sem enn getur búið heima viðeigandi stuðning. Öflug og fjölbreytt stuðningsþjónusta heim er þar vegamikill þáttur. Þá skiptir einnig máli að allir þeir sem koma að þjónustu við aldraða, ríki og sveitarfélög, vinni vel saman. Reykjavíkurborg hefur undanfarin ár veitt samþætta heimahjúkrun og heimaþjónustu til íbúa Reykjavíkur gegn samningi við ríkið. Ljóst er eftir innleiðingu verkefnisins að samþættingin veitir notendum heildstæðari þjónustu en áður. Nú hefur samningurinn verið endurnýjaður og sérstakt fjármagn sett í að sinna endurhæfingu í heimahúsi.

Hugmyndafræði endurhæfingar í heimahúsum stuðlar að sjálfstæði, auknu öryggi og sjálfsbjargargetu, betri lífsgæðum og meiri virkni eldra fólks. Með þeirri nálgun fá eldri borgarar, sem vegna færniskerðingar eða í kjölfar slysa og veikinda upplifa erfiðleika við athafnir daglegs lífs, aðstoð á eigin heimili. Aðstoðin felst í því að virkja notendur og styrkja þá til að vera virkir þátttakendur í eigin lífi eins lengi og mögulegt er. Endurhæfingin er veitt af fagaðilum og fer þjónustan öll fram inni á heimili viðkomandi og í hans daglega umhverfi.

Mikilvægt samstarf

Samstarf ríkis og sveitarfélaga er mikilvægur hlekkur í því að tryggja öldruðum samfellda gæðaþjónustu. Núverandi fyrirkomulag samþættrar heimaþjónustu og heimahjúkrunar hjá Reykjavíkurborg er til fyrirmyndar og því vert að efla það fyrirkomulag enn frekar. Í því skyni að stuðla að enn markvissara samstarfi ríkisins og Reykjavíkurborgar í þessum málaflokki boðaði heilbrigðisráðherra, í samvinnu við Landspítala og formann velferðarráðs Reykjavíkurborgar, til vinnustofu í lok apríl. Þar ræddu saman aðilar, sem koma að öldrunarþjónustu, um áskoranir í þjónustu við aldraða. Lögð verður áhersla á að vinna úr þeim tillögum, sem vinnustofan skilaði, með það að markmiði að gera þjónustu við aldraða enn heildstæðari og markvissari.

Svandís Svavarsdóttir heilbrigðisráðherra og Elín Oddný Sigurðardóttir formaður velferðarráðs Reykjavíkurborgar

Greinin birtist fyrst í 1. maí blaði Vinstri grænna í Reykjavík og á vg.is

Afrakstur nýköpunarvinnustofunnar má finna hér

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar

Við styðjum ekki aldraða með skattalækkunum á hátekjufólk

Málefni eldri borgara eru eitt af stóru málunum í þessum kosningum. Í þeim efnum höfum við í Vinstri grænum lagt áherslu á að Reykjavík sé aldursvæn borg þar sem eldri borgarar jafnt sem yngra fólk geti lifað góðu og gefandi lífi.

Aldursvæn borg
Við gerum Reykjavík ekki að aldursvænni borg með skattalækkunum sem eru sérhannaðar fyrir þá tekjuhæstu í þessum hópi. Eins og Líf Magneudóttir benti á í grein hér í gær veitir Reykjavíkurborg nú þegar tekjulágu eldra fólki afslætti af fasteignagjöldum. Við gerum Reykjavík að aldursvænni borg með því að taka mið af þörfum aldraðra við alla stefnumótun og ákvarðanatöku, með því að styðja eldra fólk til að búa heima, efla heimahjúkrun og heimaþjónustu, efla félagsstarf eldri borgara og berjast gegn félaglegri einangrun og fátækt meðal eldri borgara.

Eldri borgarar hafa ekki gert kröfu um skattalækkanir handa tekjuháu fólki, heldur félagslegan stuðning handa þeim sem þess þurfa.

Hlustum á eldra fólk
Við verðum að virða reynslu, skoðanir og sjálfákvörðunarrétt eldra fólks og huga að ólíkum aðgengisþörfum. Við verðum að stuðla að því að hver og einn geti verið virkur í samfélaginu, óháð aldri eða annarri þjóðfélagsstöðu, og við þurfum að gera eldri borgurum kleift að rækta fjölskyldu- og vinatengsl, skapa tækifæri fyrir eldra fólk til að njóta samveru og þátttöku í fjölbreyttu félags- og menningarlífi.

Til þess að ná þessum markmiðum höfum við í Vinstri grænum lagt áherslu á raunhæf skref til að mæta þörfum eldri borgara:

  • Menningar og lýðheilsukort aldraðra: Á þessu kjörtímabili höfum við í VG beitt okkur fyrir því að borgin bjóði upp á menningar- og lýðheilsukort fyrir aldraða, til að efla hreyfingu og félagsstarf eldra fólks. Nú er ókeypis í sund, söfn borgarinnar og bókasöfn frá 67 ára og verulegur afsláttur í strætó.
  • Fleiri hjúkrunar og dvalarrými: Auka þarf samvinnu við ríkið til að tryggja nægt framboð af hjúkrunar- og dagdvalarrýmum fyrir eldra fólk í borginni.
  • Endurhæfing í heimahúsi: Efla verður og bæta endurhæfingu í heimahúsi, auk þess sem sjúkra-og iðjuþjálfar þurfa að bætast við þann hóp sem annast aðallega þjónustu við aldraða.
  • Nýtum velferðartækni: Fjölgun aldraðra og aukin fjölbreytni meðal þeirra kallar á margvíslegar lausnir. Ný tækifæri liggja á sviði velferðartækni og nýsköpunarverkefnum á borð við endurhæfingu í heimahúsi og rafrænt heimaþjónustukerfi
  • Rjúfum félagslega einangrun: Á þessu kjörtímabili höfum við í VG stutt aðgerðir sem stuðla að samveru kynslóðanna. Efla þarf verkefni á borð við að háskólanemum sé boðið upp á íbúðir í þjónustuíbúðakjörnum eldri borgara.
  • Allskonar eldra fólk: Þarfir eldri borgara eru allskonar, og borgin þarf að mæta þörfum hinsegin eldra fólks og eldra fólks af erlendum uppruna.

Það er mikilvæg framtíðarsýn okkar í Vinstri grænum að eldri borgarar ráði sér sjálfir og að öll aðstoð taki mið af því að fólk fái tækifæri til að viðhalda færni sinni og þeim sé gert mögulegt að halda áfram að lifa því lífi sem þeir kjósa. Núverandi ástand er óboðlegt, því hluti eldri borgara býr við félagslega einangrun og sára fátækt. Það er óásættanlegt og forgangsmál að lagfæra.

Skattalækkanir á hátekjufólk eru ekki til þess fallnar að aðstoða fátækt eldra fólk. Það gerum við með öflugri þjónustu sem rekin er fyrir fé úr sameiginlegum sjóðum.

Greinin birtist fyrst á vísir.is

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar

Ný Innflytjendastefna samþykkt- Ræða flutt í Borgarstjórn.

Kæru borgarfulltrúar, borgarstjóri og kæru áheyrendur.

Við búum í fjölmenningarlegri borg sem hefur tekið hefur þátt í netverkinu Intercultural Cities frá árinu 2014. Það er því löngu orðið tímabært að Reykjavíkurborg setji sér heilstæða stefnu í málefnum innflytjenda, flóttafólks og umfjöllun um alþjóðlega vernd. Við alla umfjöllun hér framundan ber að hafa þann fyrirvara að ekki er hægt að líta á innflytjendur sem einsleitan hóp. Þarfir innflytjenda eru jafn fjölbreyttar og annarra borgarbúa. Þó þurfum við ávallt að hafa í huga þær hindranir sem innflytjendur mæta í þjónustu borgarinnar eða til þess að þeir geti notið sín í starfi og er stefna og þær aðgerðir sem henni fylgja til þess fallnar að útrýma slíkum hindrunum.

Stýrihópur var skipaður í september 2016 og skilaði drögum að stefnu og aðgerðaráætlun í september 2017. Í hópnum áttu allir flokkar sem sæti eiga í borgarstjórn fulltrúa ásamt áheyrnarfulltrúa fjölmenningarráðs. Stefnan var sett í umsagnarferli s.l. sumar og framhaldi var brugðist við þeim athugasemdum sem bárust. Þann 19. desember s.l. fór fram fyrri umræða um stefnuna ásamt aðgerðaráætlun í borgarstjórn.

Eftir fyrri umræðu í borgarstjórn var óskað eftir frekari umsögnum frá þeim sviðum og skrifstofum borgarinnar sem ætlað er að framfylgja aðgerðum tengdum stefnumótuninni, þar sem hver aðgerð var skoðuð og rýnd frekar. Sjö svið og skrifstofur sendu svör við þeim spurningum og í framhald að því voru aðgerðir stefnunnar metnar út frá þeim svörum sem bárust. Auk þess var stefnumótun einstakra sviða tengd innflytjendamálum skoðuð og samlegðaráhrif við stefnur einstakra sviða og málaflokka skoðuð. Ljóst er eftir þá greiningu að mikið af því sem tiltekið er í aðgerðaráætlun með stefnu í málefnum innflytjenda, hælisleitenda og umsækjenda um alþjóðlega vernd má finna í annarri stefnumótun borgarinnar sem þegar hefur verið samþykkt í ýmsum málaflokkum.

Eitt að þeim atriðum sem margir sérfræðingar nefndu sem stýrihópurinn ræddi við var að það vantaði heildstæða yfirsýn yfr málaflokkinn á einum stað í borgarkerfinu. Samþykkt þeirrar stefnu og þeirrar aðgerðaráætlunar sem hér liggur fyrir er til þess fallinn að bregðast við þeim ábendingum og halda miðlægt utan um þau fjölmörgu verkefni sem unnin eru víðsvegar um borgina í þessum mikilvæga málaflokki. Ég tel að hér sé um mikilvægt skref en ein heildarstefnumótun ásamt aðgerðaráætlun veitir Reykjavíkurborg sem stjórnvaldi, atvinnurekenda og miðstöð þjónustu,  ákveðna yfirsýn yfir málaflokkinn á einum stað. Ég tel einnig að stofnun þverfaglegs teymis sem vinnur þvert á svið sé til þess fallið að bæta þjónustuna og gera hana skilvirkari.

Aðgerðaráætlunin með stefnunni er gerð til fjögurra ára í senn og er gert ráð fyrir að hún verði leiðarljós við þá vinnu sem Reykjavíkurborg stendur frammi fyrir við að þjónusta hóp innflytjenda og flóttafólks. Í þeirri aðgerðaráætlun sem nú liggur fyrir er ljóst að framvinda verkefna fer eftir því fjármagni sem nú er til staðar innan sviða og skrifstofa Reykjavíkurborgar og mun fjármagn verða tryggt við afgreiðslu fjárhagsáæltunar hvers árs eins og venja er. Ef flýta á framgangi verkefna gæti það í einstaka tilvikum kallað á aukafjárveitingar.

Mannréttindaskrifstofa hefur nú þegar yfirumsjón með eftirliti með aðgerðaráætlun í jafnréttismálum og er það skilningur minn að umsjón með aðgerðaráætlun í innflyltjendamálum muni fara fram með svipuðum hætti hvað varðar eftirfylgd með þeirri áætlun.

Það er ákveðin sýn sem felst í því að líta á innflytjendur sem auðlind fyrir samfélagið. Sem fjölmenningarborg á Reykjavíkurborg að stuðla að því að allir sem hér setjast að og búa upplifi sig sem Reykvíkinga óháð þjóðerni og uppruna, þá höfum við náð árangri í að skapa borg fyrir alla.

Ég vil að lokum þakka öllum í stýrihópnum fyrir þeirra framlag sem og starfsmanni hópsins auk þeirra fjölmörgu aðila sem hittu hópinn, miðluðu af reynslu sinni og veittu umsangir. Auk þess ber að þakka sérstaklega þá vinnu sem innt hefur verið af hendi hjá mannréttindaskrifstofu Reykjavíkurborgar vegna stefnumótunarinnar.

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Ræður

Femínismi, friður og baráttan gegn feðraveldinu.

Ræða flutt á Alþjóðlegum baráttudegi kvenna fyrir friði og janfrétti í Tjarnarbíó 08.03.2018.

Kæru konur!

Konur hafa verið leiðandi í baráttunni fyrir friði og jafnrétti, bæði hér á landi sem og erlendis. Konur bylta samfélögum, án stríðsátaka og hernaðar. Kvennasamstaðan hefur áorkað mörgu og við skulum í dag heiðra minningu þeirra fjölmörgu kvenna sem ruddu brautina fyrir okkur hinar. Við þurfum líka að muna beina sjónum okkar að þeirri margþættu mismunum sem konur verða fyrir, konur af erlendum uppruna, hinsegin konur og fatlaðar konur heyja margþátta baraáttu gegn þeirri margþættu mismunum sem þær verða fyrir á hverjum degi.

Baráttan fyrir friði er líka barátta gegn heimsmynd feðraveldisins. Ríkjandi orðræða hins stríðsóða feðraveldis stimplar hvers kyns andóf kvenna gegn stríði sem einhverskonar væl þeirra þar sem þær láta tilfinningar sínar bera sig ofurliði. Kúgaðir hópar samfélagsins þar á meðal konur þekkja vel þá aðferð þegar lítið er gert úr þeim í opinberri umræðu til þess að karlar geti viðhaldið völdum sínum og tryggt yfirráð sín í samfélaginu.

Kæru konur!

Í þessu samhengi er mikilvægt að nefna kenningar norsku fræðikonunnar Berit Ås um drottnunaraðferðirnar fimm. Konur eru gerðar ósýnilegar í opinberri umræðu, þetta á við konur innan friðarhreyfingarinnar sem og annarsstaðar í samfélaginu þar sem konur berjast gegn kúgun. Konur mæta framkomu sem ýtir undir það að þær upplifi skoðanir sínar sem minna virði en skoðanir karla. Konur eru gerðar hlægilegar, skoðanir þeirra eru taldar byggja á tilfinningasemi eða kynbundnum líffræðilegum þáttum. Afleiðingar slíkra aðferða er að konur efast sífellt um réttmæti skoðanna sinna og konur þora síður að stíga fram sem málsvarar fyrir samfélagslegum málefnum á borð við friðarstefnu. Upplýsingum er leynt frá konum, karlar skiptast á mikilvægum upplýsingum oft í óformlegum hópum sem konur hafa ekki aðgang að. Konum er refsað fyrir að hafa vitlausa forgangsröðun í lífinu.

Konur sem láta samfélagsleg mál sig varða eru sérstaklega berskjaldaðar. Má nefna opinberar aftökur samfélagsmiðla á femínistum í þessu samhengi. Við konur eigum einfaldlega bara að forgagnsraða rétt, hugsa um börnin og skúra eldhúsgólfið. Konur eiga bara að kunna að skammast sín og fá sektarkennd fyrir að beita sér í opinberri umræðu. Við verðum að passa það að það eru ekki einungis karlrembur sem beita þessum aðferðum til að viðhalda feðraveldinu. Við gerum það örugglega margar hverjar einhvern tímann, sennilega ómeðvitað. Við þurfum sem konur sem berjast gegn hvers kyns kúgun að standa saman og benda á þegar aðferðum sem þessum er beitt. Við verðum að benda á ósanngrinina og nýta kvennasamstöðuna, þannig náum við árangri.

Kæru konur!

Á meðan að við erum hér á þessum fundi eru ríflega 32 miljónir kvenna og stúlkna á flótta eða hafa neyðst til að flýja heimili sín vegna stríðsátaka víðs vegar í heiminum. Konur og stúlkur á flótta eru í sérstaklega varnarlausri stöðu og eru í mikilli hættu á að verða fyrir hvers kyns ofbeldi, bæði andlegu, líkamlegu og kynferðislegu. Konur á flótta hafa takmarkaðan aðgang að getnaðarvörnum, fæðingarhjálp er nánast engin, mæðradauði er mjög algengur og ungbarnavernd og önnur heilbrigðisjþjónusta er af mjög skornum skammti.

En þessar konur er ekki einungis tölur á blaði, þær eiga allar sínar mikilvægu sögu að segja. Staðreyndin er sú að það eru konur sem byggja upp samfélög í kjölfar stríða og eru lykilgerendur í því að viðhalda friði og öryggi á áður stríðshrjáðum svæðum. Reynslan hefur sýnt að farsælasta þróunaraðstoðin felst í því að styrkja fjölbreyttan atvinnurekstur kvenna og aðstoða þær við uppbyggingu samfélagsins.

Saman getum við konur barist gegn kúgun og misrétti. Við þurfum ávallt að muna að baráttan er alþjóðleg og hún nær til margþættrar mismununar.

Kæru konur, til hamingju með daginn.

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Ræður

Afhending styrkja Velferðarráðs

Ræða flutt við afhendingu styrkja Velferðarráðs

Kæru gestir!

Velferðarráð Reykjavíkurborgar úthlutar ár hvert styrkjum til frjálsra félagasamtaka og einstaklinga. Markmið styrkja ráðsins er að styrkja við sjálfsprottið starf og starfssemi frjálsra félagasamtaka á sviði velferðarmála.

Þau verkefni sem hljóta styrki eru mjög fjölbreytt en öll eiga það sameiginlegt að snúa að aukinni velferð borgarbúa og stuðla að fjölbreyttu mannlífi í borginni okkar. Markmið styrkveitinga velferðarráðs er meðal annars að styrkja og efla til samstarfs við félagsasamtök og einstaklinga um uppbyggilega starfssemi og þjónustu við. En meðal áherslna er að styðja við margvísleg og fjölbreytt verkefni. Við val á verkefnum er tekið mið að því hvort þau falli að áherslum velferðarráðs. Auk almennra styrkja gerir velferðarráð tillögu um þjónustusamninga til eins árs eða þriggja ára í senn. Þessir samningar skulu taka mið af lagalegum skyldum sveitarfélagsins á sviði velferðarm´la á hverjum tíma.

Vegna verkefna á árinu 2018 voru samtals 40 styrkir samþykktir. Þar af eru 28 almennir verkefnastyrkir. Fjórtán þjónustusamningar til eins árs og fimm þjónustusamingar til þriggja ára. Alls er rúmlega 100 miljónum varið í styrki til velferðarmála vegna ársins 2018 en fyrir eru tæpar 40 miljónir bundnar í fyrri samningum.

Mikið af mikilvægri velferðarþjónustu er sinnt af ýmsum grasrótarsamtökum og góðgerðarfélögum sem unnið hafa mikilvægt starf í þágu aukinnar velferðar borgarbúa, mörg hver árum saman. Slíkt ber að þakka.

Ég vil að lokum óska styrkþegum innilega til hamingju og þakka þeim fyrir að sinna mikilvægri velferðarþjónustu við borgarbúa, öllum til hagsbóta.

Til hamingju með daginn!

 

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Ræður

Samfélagsvæðing þjónustu borgarinnar skilar sparnaði og betri þjónustu

Helstu rökin fyrir einkavæðingu og úthýsingu verkefna sem eru á hendi hins opinbera hafa yfirleitt verið þau að einkarekstur sé hagkvæmari. Þessi fullyrðing, sem jaðrar við trúarsetningu hjá mörgum, hefur verið notuð til þess að réttlæta að einkafyrirtæki hafa fengið að sinna almannaþjónustu í auknum mæli.

Reynslan sýnir að árangurinn er engan veginn jafn afgerandi og trúarsetningin gefur til kynna. Þvert á móti. Einkavæðing heilbrigðisþjónustu í Svíþjóð hefur til dæmis leitt til verri og dýrari þjónustu, meðan peningamenn græða og safna sjóðum í skattaskjólum.

Við í Vinstrihreyfingunni grænu framboði höfum alltaf hafnað þessari hugmyndafræði. Við höfum barist gegn einkavæðingu og úthýsingu á þjónustu ríkis og borgar og barist fyrir því að undið sé ofan af einkavæðingu sem hefur átt sér stað. Reynslan sýnir að þegar við samfélagsvæðum grunnþjónustu sem hefur áður verið sinnt af einkafyrirtækjum skilar það bæði ódýrari og betri þjónustu.

Matarþjónusta er mikilvæg þjónusta

Nú nýlega samþykkti Velferðarráð Reykjavíkurborgar að borgin tæki yfir heimsendingu matar í heimahús og móttökueldhús borgarinnar. Á síðustu árum hefur útkeyrsla og heimsending matarins verið sinnt af einkafyrirtæki í útboði.

Matarþjónusta er mikilvæg þjónusta fyrir eldri borgara og fatlað fólk sem getur ekki eldað sjálft. Á síðasta ári eldaði framleiðslueldhús borgarinnar á Lindargötu alls 98.085 matarskammta fyrir 851 notendur. Velferðarsvið mun fjárfesta í þremur bílum, þar af tveimur rafmagnsbílum og ráða til sín starfsfólk til að sinna þessarri þjónustu.

Betri þjónusta við viðkvæma hópa

Heimsending matar krefst bæði nærgætni og aðgæslu. Sá sem kemur með matinn þarf í mörgum tilfellum að fara inn á heimili fólks sem er í mjög viðkvæmri stöðu. Með því að gera heimsendingu matar hluta af þjónustu Reykjavíkurborgar, í stað þess að hún sé á hendi einkaaðila, aukast möguleikar á eftirliti og auðveldara verður að bregðast við athugasemdum notenda.

Með því að framreiðslueldhúsið sjái um heimsendingu og útkeyrslu skapast líka möguleikar á samvinnu við heimaþjónustu og heimahjúkrun borgarinnar. Þannig má nýta heimsendingu matar til þess að líta til með fötluðu og öldruðu fólki sem þarf á aðstoð að halda.

Meiri samfella verður í þjónustunni, gæði henna aukast, yfirsýn verður betri og eftirfylgni við notendur eykst. Reksturinn verður heildstæðari þar sem allt ferlið lýtur sömu stjórn. Þjónustan batnar ekki bara, heldur lækkar kostnaður einnig.

Sparnaður verður nýttur til að bæta þjónustuna

Velferðarsvið Reykjavíkur hefur reiknað út að verulegur sparnaður felist í því að borgin sinni allri þjónustukeðjunni sjálf. Eftir að stofnkostnaður hefur verið greiddur er hagræðingin áætluð 19,3 milljónir króna á ári.

Sá sparnaður mun að fullu fara til þess að bæta þjónustu framleiðslueldhúss Reykjavíkurborgar. Matreiðslumaður verður ráðinn til að vinna meira hráefni frá grunni og lágmarka innkaup borgarinnar á tilbúnum mat. Þannig aukast gæði og fjölbreytni matarins.

Eflum félagslega rekna grunnþjónustu

Markmið velferðarþjónustu á ekki að vera gróði heldur þjónusta við notendur. Fjármunir sem hið opinbera veitir í slíka þjónustu eiga allir að fara í þjónustuna sjálfa, ekki í arðgreiðsur í vasa eigenda gróðardrifinna fyrirækja.

Í dag fer enn talsverður arður til eigenda ýmissa fyritækja í heilbrigðis-og velferðarþjónustu. Það er mikilvægt að við komum böndum á þær arðgreiðslur áður en við lendum í sömu ógöngum og Svíar þar sem hið opinbera greiðir milljarða í arð til einkarekinna gróðafyritækja í velferðarþjónustu.

Meðan einkafyrirtæki fá að reka grunnþjónustu í heilbrigðis- og velferðarmála er hins vegar mikilvægt að stjórnvöld komi böndum á arðgreiðslur þessara fyrirtækja. Mikilvæg skref í þá átt voru tekin í ríkisstjórnartíð Vinstri grænna og Samfylkingar þegar bönd voru sett á arðgreiðslur einkarekinna skóla.

Heilbrigðis-og velferðarþjónusta er mikilvæg grunnþjónusta sem ætti að reglu að vera á hendi opinberra aðila. Slíkt þarf að tryggja öllum til hagsbóta.

Greinin birtist fyrst á Stundinni 23.02.2018

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar