Ný Innflytjendastefna samþykkt- Ræða flutt í Borgarstjórn.

Kæru borgarfulltrúar, borgarstjóri og kæru áheyrendur.

Við búum í fjölmenningarlegri borg sem hefur tekið hefur þátt í netverkinu Intercultural Cities frá árinu 2014. Það er því löngu orðið tímabært að Reykjavíkurborg setji sér heilstæða stefnu í málefnum innflytjenda, flóttafólks og umfjöllun um alþjóðlega vernd. Við alla umfjöllun hér framundan ber að hafa þann fyrirvara að ekki er hægt að líta á innflytjendur sem einsleitan hóp. Þarfir innflytjenda eru jafn fjölbreyttar og annarra borgarbúa. Þó þurfum við ávallt að hafa í huga þær hindranir sem innflytjendur mæta í þjónustu borgarinnar eða til þess að þeir geti notið sín í starfi og er stefna og þær aðgerðir sem henni fylgja til þess fallnar að útrýma slíkum hindrunum.

Stýrihópur var skipaður í september 2016 og skilaði drögum að stefnu og aðgerðaráætlun í september 2017. Í hópnum áttu allir flokkar sem sæti eiga í borgarstjórn fulltrúa ásamt áheyrnarfulltrúa fjölmenningarráðs. Stefnan var sett í umsagnarferli s.l. sumar og framhaldi var brugðist við þeim athugasemdum sem bárust. Þann 19. desember s.l. fór fram fyrri umræða um stefnuna ásamt aðgerðaráætlun í borgarstjórn.

Eftir fyrri umræðu í borgarstjórn var óskað eftir frekari umsögnum frá þeim sviðum og skrifstofum borgarinnar sem ætlað er að framfylgja aðgerðum tengdum stefnumótuninni, þar sem hver aðgerð var skoðuð og rýnd frekar. Sjö svið og skrifstofur sendu svör við þeim spurningum og í framhald að því voru aðgerðir stefnunnar metnar út frá þeim svörum sem bárust. Auk þess var stefnumótun einstakra sviða tengd innflytjendamálum skoðuð og samlegðaráhrif við stefnur einstakra sviða og málaflokka skoðuð. Ljóst er eftir þá greiningu að mikið af því sem tiltekið er í aðgerðaráætlun með stefnu í málefnum innflytjenda, hælisleitenda og umsækjenda um alþjóðlega vernd má finna í annarri stefnumótun borgarinnar sem þegar hefur verið samþykkt í ýmsum málaflokkum.

Eitt að þeim atriðum sem margir sérfræðingar nefndu sem stýrihópurinn ræddi við var að það vantaði heildstæða yfirsýn yfr málaflokkinn á einum stað í borgarkerfinu. Samþykkt þeirrar stefnu og þeirrar aðgerðaráætlunar sem hér liggur fyrir er til þess fallinn að bregðast við þeim ábendingum og halda miðlægt utan um þau fjölmörgu verkefni sem unnin eru víðsvegar um borgina í þessum mikilvæga málaflokki. Ég tel að hér sé um mikilvægt skref en ein heildarstefnumótun ásamt aðgerðaráætlun veitir Reykjavíkurborg sem stjórnvaldi, atvinnurekenda og miðstöð þjónustu,  ákveðna yfirsýn yfir málaflokkinn á einum stað. Ég tel einnig að stofnun þverfaglegs teymis sem vinnur þvert á svið sé til þess fallið að bæta þjónustuna og gera hana skilvirkari.

Aðgerðaráætlunin með stefnunni er gerð til fjögurra ára í senn og er gert ráð fyrir að hún verði leiðarljós við þá vinnu sem Reykjavíkurborg stendur frammi fyrir við að þjónusta hóp innflytjenda og flóttafólks. Í þeirri aðgerðaráætlun sem nú liggur fyrir er ljóst að framvinda verkefna fer eftir því fjármagni sem nú er til staðar innan sviða og skrifstofa Reykjavíkurborgar og mun fjármagn verða tryggt við afgreiðslu fjárhagsáæltunar hvers árs eins og venja er. Ef flýta á framgangi verkefna gæti það í einstaka tilvikum kallað á aukafjárveitingar.

Mannréttindaskrifstofa hefur nú þegar yfirumsjón með eftirliti með aðgerðaráætlun í jafnréttismálum og er það skilningur minn að umsjón með aðgerðaráætlun í innflyltjendamálum muni fara fram með svipuðum hætti hvað varðar eftirfylgd með þeirri áætlun.

Það er ákveðin sýn sem felst í því að líta á innflytjendur sem auðlind fyrir samfélagið. Sem fjölmenningarborg á Reykjavíkurborg að stuðla að því að allir sem hér setjast að og búa upplifi sig sem Reykvíkinga óháð þjóðerni og uppruna, þá höfum við náð árangri í að skapa borg fyrir alla.

Ég vil að lokum þakka öllum í stýrihópnum fyrir þeirra framlag sem og starfsmanni hópsins auk þeirra fjölmörgu aðila sem hittu hópinn, miðluðu af reynslu sinni og veittu umsangir. Auk þess ber að þakka sérstaklega þá vinnu sem innt hefur verið af hendi hjá mannréttindaskrifstofu Reykjavíkurborgar vegna stefnumótunarinnar.

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Ræður

Femínismi, friður og baráttan gegn feðraveldinu.

Ræða flutt á Alþjóðlegum baráttudegi kvenna fyrir friði og janfrétti í Tjarnarbíó 08.03.2018.

Kæru konur!

Konur hafa verið leiðandi í baráttunni fyrir friði og jafnrétti, bæði hér á landi sem og erlendis. Konur bylta samfélögum, án stríðsátaka og hernaðar. Kvennasamstaðan hefur áorkað mörgu og við skulum í dag heiðra minningu þeirra fjölmörgu kvenna sem ruddu brautina fyrir okkur hinar. Við þurfum líka að muna beina sjónum okkar að þeirri margþættu mismunum sem konur verða fyrir, konur af erlendum uppruna, hinsegin konur og fatlaðar konur heyja margþátta baraáttu gegn þeirri margþættu mismunum sem þær verða fyrir á hverjum degi.

Baráttan fyrir friði er líka barátta gegn heimsmynd feðraveldisins. Ríkjandi orðræða hins stríðsóða feðraveldis stimplar hvers kyns andóf kvenna gegn stríði sem einhverskonar væl þeirra þar sem þær láta tilfinningar sínar bera sig ofurliði. Kúgaðir hópar samfélagsins þar á meðal konur þekkja vel þá aðferð þegar lítið er gert úr þeim í opinberri umræðu til þess að karlar geti viðhaldið völdum sínum og tryggt yfirráð sín í samfélaginu.

Kæru konur!

Í þessu samhengi er mikilvægt að nefna kenningar norsku fræðikonunnar Berit Ås um drottnunaraðferðirnar fimm. Konur eru gerðar ósýnilegar í opinberri umræðu, þetta á við konur innan friðarhreyfingarinnar sem og annarsstaðar í samfélaginu þar sem konur berjast gegn kúgun. Konur mæta framkomu sem ýtir undir það að þær upplifi skoðanir sínar sem minna virði en skoðanir karla. Konur eru gerðar hlægilegar, skoðanir þeirra eru taldar byggja á tilfinningasemi eða kynbundnum líffræðilegum þáttum. Afleiðingar slíkra aðferða er að konur efast sífellt um réttmæti skoðanna sinna og konur þora síður að stíga fram sem málsvarar fyrir samfélagslegum málefnum á borð við friðarstefnu. Upplýsingum er leynt frá konum, karlar skiptast á mikilvægum upplýsingum oft í óformlegum hópum sem konur hafa ekki aðgang að. Konum er refsað fyrir að hafa vitlausa forgangsröðun í lífinu.

Konur sem láta samfélagsleg mál sig varða eru sérstaklega berskjaldaðar. Má nefna opinberar aftökur samfélagsmiðla á femínistum í þessu samhengi. Við konur eigum einfaldlega bara að forgagnsraða rétt, hugsa um börnin og skúra eldhúsgólfið. Konur eiga bara að kunna að skammast sín og fá sektarkennd fyrir að beita sér í opinberri umræðu. Við verðum að passa það að það eru ekki einungis karlrembur sem beita þessum aðferðum til að viðhalda feðraveldinu. Við gerum það örugglega margar hverjar einhvern tímann, sennilega ómeðvitað. Við þurfum sem konur sem berjast gegn hvers kyns kúgun að standa saman og benda á þegar aðferðum sem þessum er beitt. Við verðum að benda á ósanngrinina og nýta kvennasamstöðuna, þannig náum við árangri.

Kæru konur!

Á meðan að við erum hér á þessum fundi eru ríflega 32 miljónir kvenna og stúlkna á flótta eða hafa neyðst til að flýja heimili sín vegna stríðsátaka víðs vegar í heiminum. Konur og stúlkur á flótta eru í sérstaklega varnarlausri stöðu og eru í mikilli hættu á að verða fyrir hvers kyns ofbeldi, bæði andlegu, líkamlegu og kynferðislegu. Konur á flótta hafa takmarkaðan aðgang að getnaðarvörnum, fæðingarhjálp er nánast engin, mæðradauði er mjög algengur og ungbarnavernd og önnur heilbrigðisjþjónusta er af mjög skornum skammti.

En þessar konur er ekki einungis tölur á blaði, þær eiga allar sínar mikilvægu sögu að segja. Staðreyndin er sú að það eru konur sem byggja upp samfélög í kjölfar stríða og eru lykilgerendur í því að viðhalda friði og öryggi á áður stríðshrjáðum svæðum. Reynslan hefur sýnt að farsælasta þróunaraðstoðin felst í því að styrkja fjölbreyttan atvinnurekstur kvenna og aðstoða þær við uppbyggingu samfélagsins.

Saman getum við konur barist gegn kúgun og misrétti. Við þurfum ávallt að muna að baráttan er alþjóðleg og hún nær til margþættrar mismununar.

Kæru konur, til hamingju með daginn.

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Ræður

Afhending styrkja Velferðarráðs

Ræða flutt við afhendingu styrkja Velferðarráðs

Kæru gestir!

Velferðarráð Reykjavíkurborgar úthlutar ár hvert styrkjum til frjálsra félagasamtaka og einstaklinga. Markmið styrkja ráðsins er að styrkja við sjálfsprottið starf og starfssemi frjálsra félagasamtaka á sviði velferðarmála.

Þau verkefni sem hljóta styrki eru mjög fjölbreytt en öll eiga það sameiginlegt að snúa að aukinni velferð borgarbúa og stuðla að fjölbreyttu mannlífi í borginni okkar. Markmið styrkveitinga velferðarráðs er meðal annars að styrkja og efla til samstarfs við félagsasamtök og einstaklinga um uppbyggilega starfssemi og þjónustu við. En meðal áherslna er að styðja við margvísleg og fjölbreytt verkefni. Við val á verkefnum er tekið mið að því hvort þau falli að áherslum velferðarráðs. Auk almennra styrkja gerir velferðarráð tillögu um þjónustusamninga til eins árs eða þriggja ára í senn. Þessir samningar skulu taka mið af lagalegum skyldum sveitarfélagsins á sviði velferðarm´la á hverjum tíma.

Vegna verkefna á árinu 2018 voru samtals 40 styrkir samþykktir. Þar af eru 28 almennir verkefnastyrkir. Fjórtán þjónustusamningar til eins árs og fimm þjónustusamingar til þriggja ára. Alls er rúmlega 100 miljónum varið í styrki til velferðarmála vegna ársins 2018 en fyrir eru tæpar 40 miljónir bundnar í fyrri samningum.

Mikið af mikilvægri velferðarþjónustu er sinnt af ýmsum grasrótarsamtökum og góðgerðarfélögum sem unnið hafa mikilvægt starf í þágu aukinnar velferðar borgarbúa, mörg hver árum saman. Slíkt ber að þakka.

Ég vil að lokum óska styrkþegum innilega til hamingju og þakka þeim fyrir að sinna mikilvægri velferðarþjónustu við borgarbúa, öllum til hagsbóta.

Til hamingju með daginn!

 

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Ræður

Samfélagsvæðing þjónustu borgarinnar skilar sparnaði og betri þjónustu

Helstu rökin fyrir einkavæðingu og úthýsingu verkefna sem eru á hendi hins opinbera hafa yfirleitt verið þau að einkarekstur sé hagkvæmari. Þessi fullyrðing, sem jaðrar við trúarsetningu hjá mörgum, hefur verið notuð til þess að réttlæta að einkafyrirtæki hafa fengið að sinna almannaþjónustu í auknum mæli.

Reynslan sýnir að árangurinn er engan veginn jafn afgerandi og trúarsetningin gefur til kynna. Þvert á móti. Einkavæðing heilbrigðisþjónustu í Svíþjóð hefur til dæmis leitt til verri og dýrari þjónustu, meðan peningamenn græða og safna sjóðum í skattaskjólum.

Við í Vinstrihreyfingunni grænu framboði höfum alltaf hafnað þessari hugmyndafræði. Við höfum barist gegn einkavæðingu og úthýsingu á þjónustu ríkis og borgar og barist fyrir því að undið sé ofan af einkavæðingu sem hefur átt sér stað. Reynslan sýnir að þegar við samfélagsvæðum grunnþjónustu sem hefur áður verið sinnt af einkafyrirtækjum skilar það bæði ódýrari og betri þjónustu.

Matarþjónusta er mikilvæg þjónusta

Nú nýlega samþykkti Velferðarráð Reykjavíkurborgar að borgin tæki yfir heimsendingu matar í heimahús og móttökueldhús borgarinnar. Á síðustu árum hefur útkeyrsla og heimsending matarins verið sinnt af einkafyrirtæki í útboði.

Matarþjónusta er mikilvæg þjónusta fyrir eldri borgara og fatlað fólk sem getur ekki eldað sjálft. Á síðasta ári eldaði framleiðslueldhús borgarinnar á Lindargötu alls 98.085 matarskammta fyrir 851 notendur. Velferðarsvið mun fjárfesta í þremur bílum, þar af tveimur rafmagnsbílum og ráða til sín starfsfólk til að sinna þessarri þjónustu.

Betri þjónusta við viðkvæma hópa

Heimsending matar krefst bæði nærgætni og aðgæslu. Sá sem kemur með matinn þarf í mörgum tilfellum að fara inn á heimili fólks sem er í mjög viðkvæmri stöðu. Með því að gera heimsendingu matar hluta af þjónustu Reykjavíkurborgar, í stað þess að hún sé á hendi einkaaðila, aukast möguleikar á eftirliti og auðveldara verður að bregðast við athugasemdum notenda.

Með því að framreiðslueldhúsið sjái um heimsendingu og útkeyrslu skapast líka möguleikar á samvinnu við heimaþjónustu og heimahjúkrun borgarinnar. Þannig má nýta heimsendingu matar til þess að líta til með fötluðu og öldruðu fólki sem þarf á aðstoð að halda.

Meiri samfella verður í þjónustunni, gæði henna aukast, yfirsýn verður betri og eftirfylgni við notendur eykst. Reksturinn verður heildstæðari þar sem allt ferlið lýtur sömu stjórn. Þjónustan batnar ekki bara, heldur lækkar kostnaður einnig.

Sparnaður verður nýttur til að bæta þjónustuna

Velferðarsvið Reykjavíkur hefur reiknað út að verulegur sparnaður felist í því að borgin sinni allri þjónustukeðjunni sjálf. Eftir að stofnkostnaður hefur verið greiddur er hagræðingin áætluð 19,3 milljónir króna á ári.

Sá sparnaður mun að fullu fara til þess að bæta þjónustu framleiðslueldhúss Reykjavíkurborgar. Matreiðslumaður verður ráðinn til að vinna meira hráefni frá grunni og lágmarka innkaup borgarinnar á tilbúnum mat. Þannig aukast gæði og fjölbreytni matarins.

Eflum félagslega rekna grunnþjónustu

Markmið velferðarþjónustu á ekki að vera gróði heldur þjónusta við notendur. Fjármunir sem hið opinbera veitir í slíka þjónustu eiga allir að fara í þjónustuna sjálfa, ekki í arðgreiðsur í vasa eigenda gróðardrifinna fyrirækja.

Í dag fer enn talsverður arður til eigenda ýmissa fyritækja í heilbrigðis-og velferðarþjónustu. Það er mikilvægt að við komum böndum á þær arðgreiðslur áður en við lendum í sömu ógöngum og Svíar þar sem hið opinbera greiðir milljarða í arð til einkarekinna gróðafyritækja í velferðarþjónustu.

Meðan einkafyrirtæki fá að reka grunnþjónustu í heilbrigðis- og velferðarmála er hins vegar mikilvægt að stjórnvöld komi böndum á arðgreiðslur þessara fyrirtækja. Mikilvæg skref í þá átt voru tekin í ríkisstjórnartíð Vinstri grænna og Samfylkingar þegar bönd voru sett á arðgreiðslur einkarekinna skóla.

Heilbrigðis-og velferðarþjónusta er mikilvæg grunnþjónusta sem ætti að reglu að vera á hendi opinberra aðila. Slíkt þarf að tryggja öllum til hagsbóta.

Greinin birtist fyrst á Stundinni 23.02.2018

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar

Hinseginvæn Reykjavík

Vinstri græn leggja áherslu á mannréttindi og mikilvægi þess að styðja við og styrkja fjölbreytileikann. Samningur Reykjavíkurborgar við Samtökin 78 sem undirritaður var nýverið er mikilvægur liður í því. Samningurinn fellur fullkomlega að bæði mannréttindastefnu Reykjavíkurborgar og að aðalnámsskrá leik- og grunnskóla frá 2011. Þannig gerir hann borginni kleift að uppfylla lögbundnar skyldur sínar um leið og hann er mikilvægt skref í þá átt að gera Reykjavík að borg sem hlúir að fjölbreytileikanum.

Mannréttindastefna og aðalnámsskrá
Í mannréttindastefnu borgarinnar er kveðið á um að allt starf með börnum og ungmennum taki mið af fjölbreytileika samfélagsins. Við gerum ráð fyrir því að þátttakendur geti verið hinsegin og að margskonar fjölskyldugerðir séu til. Þannig getum við unnið gegn mismunun og hvers kyns fordómum. Þá kveður stefnan á um að nemendur í grunnskólum hljóti hinsegin fræðslu enda sé að stefna Reykjavíkurborgar að hinsegin fólk njóti virðingar og að um það sé fjallað, án jaðarsetningar.

Samningurinn er líka í samræmi við ákvæði aðalnámskrár um jafnréttismenntun á öllum skólastigum. Kyn og kynhneigð eru meðal þeirra þátta sem falla undir hugtakið jafnrétti í aðalnámskrá, og tekið fram að hinseginfræði megi nýta við jafnréttiskennslu. Samtökin 78 munu halda fræðslufundi fyrir nemendur, kennara og aðra þá sem starfa hjá leik-og grunnskólum borgarinnar. Öll fræðslan mun verða skipulögð í samráði við skólastjórnendur og verkefnastjóra Jafnréttisskólans.

Staðreyndin er sú að hinsegin nemendur upplifa oft þöggun á kynhneigð sinni eða kynvitund. Slík þöggun getur leitt til eineltis og ofbeldis, kvíða og vanlíðan. Mikilvægt er að skólar rjúfi þögnina og ræði opinskátt um hinsegin fólk sem eðlilegan hluta af öllu skólastarfi; hinseginfræðsla er mikilvægur liður í því verkefni. Eins er mikilvægt að árétta að hinseginfræðsla er ekki kynfræðsla eins og sumir virðast halda.

Hinsegin félagsmiðstöð
Árið 2016 tók borgin þátt í tilraunaverkefni um hinsegin félagsmiðstöð í samstarfi við Samtökin 78. Með nýjum samningi er þetta mikilvæga verkefni fest í sessi til þriggja ára. Í frístundastefnu borgarinnar kemur fram að skapa þurfi aðstæður til að koma betur til móts við hinsegin ungmenni. Rannsóknir sýna að þetta er viðkvæmur hópur og því mikilvægt að veita honum skjól og stuðning með þessum hætti og skapa vettvang fyrir félagsstarf á þeirra eigin forsendum.

Ráðgjöf við hinsegin fólk og fjölskyldur þeirra Samtökin 78
veita hinsegin fólki og aðstandendum þeirra mikilvæga ráðgjöf. Slík ráðgjöf getur verið verið sérlega dýrmæt t.d. fyrir fólk sem er að stíga sín fyrstu skref út úr skápnum en ekki síður fyrir fjölskyldur þeirra. Því getur fylgt mikið umrót á lífi og sjálfsmynd fólks, og því gríðarlega mikilvægt að fólk geti leitað eftir aðstoð við að fóta sig og takast á við nýjan veruleika. Samningurinn styður við starf stuðningshópa fyrir hinsegin ungmenni og tryggir að umsjón þeirra sé á hendi fagaðila.

Hinseginvæn borg
Okkur ber að tryggja að hlúð sé að fjölbreytileika mannlífsins og í því samhengi skiptir máli hverjir stjórna. Allt tal um mannréttindi hinsegin fólks sem „gæluverkefni“ eiga við engin rök að styðjast. Vinstri græn hafa ávallt staðið með mannréttindum og fjölbreytileika samfélagsins og munu gera það áfram. Samningur borgarinnar við Samtökin 78 er mikilvægur hluti af því verkefni og fagna ég honum. Með því erum við að stíga skref í þá átt að skapa hinseginvænt samfélag án fordóma. Fjölbreytt mannlíf gerir borgina að góðri borg fyrir alla.

Greinin birtist fyrst á vísir.is

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar

Tillaga Vinstri grænna um aukin virknitilboð fyrir atvinnulausa og fólk á fjárhagsaðstoð fest í sessi.

Velferðarráð samþykkti á fundi sínum á dögunum að festa í sessi tillögu Vinstri grænna þess efnis að atvinnulausir og einstaklingar á fjárhagsaðstoð fái frítt sundkort og bókasafnsskirteini. Tillagan var fyrst flutt af fulltrúa vinstri grænna í borgarstjórn 2010 en hefur verið framlengd til eins árs í senn síðan þá. Nú hefur hinsvegar verið tekin sú ákvörðun að festa þessa ákvörðun í sessi og útvíkka verkefnið þannig menningarkort standi þessum hópi til boða. En í þeim felst frír aðgangur að söfnum borgarinnar auk bókasafnskirteinis. Í greinagerð velferðarsviðs koma fram að um mikilvægt virkni og forvarnarúrræði sé að ræða og því ber að fagna því að þetta fyrirkomulag hafi verð fest í sessi til framtíðar. Um mikilvægt virnkitilboð er að ræða fyrir þennan hóp sem dregur úr áhættu og félagslegri einangrun, viðheldur samfélagslegri þátttöku og bætir lífsskjör einna verst settu hópanna í okkar samfélagi.

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Blogg

Af aumingjavæðingu og aðstoð við þá sem þurfa hjálp

Talsverð umræða hefur verið í samfélaginu um stöðu ýmissa jaðarsetta hópa. Það er sérstaklega ánægjulegt að fjölmiðlar hafa fjallað mikið um málefni utangarðsfólks, því fáir ef nokkrir hópar í samfélaginu eru meira jaðarsettir í okkar samfélagi en þeir sem teljast utangarðs.

Vaxandi skilningur á vanda utangarðsfólks, sem margt glímir við fíknisjúkdóma, birtist meðal annars í því að heilbrigðisráðherra ætlar að skoða möguleika á því að opna neyslurými fyrir fíkla. Skaðaminnkandi nálgun í þjónustu við fíkla snýst ekki um lögleiðingu fíkniefna heldur afglæpavæðingu neyslu og rétt fólks til þjónustu óháð félagslegri stöðu.

En þó skilningur á vanda margra jaðarsettra hópa hafi aukist virðist samfélagsumræðan oft vera komin á þann skrýtna stað að meta þurfi hverjir séu „verðugir“ notendur velferðarþjónustunnar. Þetta birtist í dylgjum um að stór hluti þess fólks sem nýtir sér velferðarþjónustu ríkis og sveitarfélaga sé að svindla. Eða að fólk þurfi bara að „hætta þessu væli“. Það þurfi að redda sér sjálft.

Þessari mannfjandsamlegu hugmynd hefur til dæmis verið haldið á lofti af einum af frambjóðendunum í leiðtogaprófkjöri Sjálfstæðisflokksins í borginni sem fram fór á dögunum. Sá talaði um „aumingjavæðingu“, og mátti skilja af orðum hans að fólk sem þyrfti aðstoð hefði það of gott. Mikið af þessu fólki væri ekkert nema afætur á samfélaginu. Sjálfstæðisflokkurinn gerði ekkert til að sverja þennan málflutning af sér, enda eiga þessar hugmyndir sér því miður hljómgrunn í samfélaginu.

Ég sé það ekki fyrir mér að einstaklingur sem leitar sér læknisaðstoðar vegna hjartaáfalls yrðri véfengdur af samfélaginu. Hinsvegar virðist það algengt viðhorf að einstaklingar sem glíma við geðræn veikindi og fíknisjúkdóma eigi bara að hætta að kvarta og finna sér almennilega vinnu. Ég hélt lengi vel að þessar skoðanir væru á undanhaldi og ég vona svo sannarlega að það sé raunin.

Nú er ég ekki að tala gegn reglum og eftirliti í velferðarþjónustunni, en á hvaða forsendum er velferðarþjónusta veitt? Rannsóknir hafa sýnt að fólk sem glímir við geðræn veikindi og fíknisjúkdóma á erfiðara með að leita sér læknishjálpar en aðrir hópar í samfélaginu. Fjölmörg mikilvæg skref hafa verið stigin í átt að skaðaminnkandi nálgun í þjónustu. Ber þar helst að nefna verkefnið Frú Ragnheiði sem sinnir nálaskiptaþjónustu og grunnheilsugæslu fyrir þá sem teljast utangarðs. Viðhorfsbreyting samfélagsins er hafin, en betur má ef duga skal. Við þurfum að hverfa frá ölmusumiðuðu kerfi sem tortryggir fólk yfir í réttindamiðað kerfi sem býður fólk velkomið.

Fólk sem þarf aðstoð og hjálp á ekki skilið að mæta ásökunum um leti og óheiðarleika, heldur þarf að mæta hverjum og einum með virðingu og skilningi. Það er verkefni okkar allra sem samfélags að tryggja það að engin falli milli skips og bryggju.

Greinin birtist fyrst á stundinni 30.01.2018.

Deila:
  • Print
  • Facebook
  • Twitter
  • StumbleUpon

Leave a Comment

Filed under Greinar

Aukin samvera milli kynslóða

Velferðarráð samþykkti á dögunum tillögu um tilraunaverkefni þar sem háskólanemum býðst að leigja íbúð í þjónustuíbúðakjarna fyrir eldri borgara. Nemarnir leigja á hagstæðum kjörum gegn 40 tíma vinnuframlagi á mánuði við að sinna ýmsum verkefnum af félagslegum toga. Vinna þeirra er viðbót við þá þjónustu sem þegar er boðið upp á í slíkum kjörnum. Verkefnið er unnið að erlendri fyrirmynd m.a frá Bretlandi, Finnlandi og Hollandi.

Í vefritinu Lifðu núna er fjallað um nýlega bandaríska rannsókn sem sýnir að eldra fólki er hættara við að þróa með sér þunglyndi og er einmanaleiki einn áhættuþáttur þess. Aðrir áhættuþættir eru fráfall maka og ættinga og sjúkdómar. Bretland hefur einnig verið í sviðsljósinu eftir að Tracey Crouch var á dögunum skipuð sem ráðherra gegn félagslegri einangrun og einmanaleika. Mikil umræða hefur verið um einsemd eldra fólks í Bretlandi og hafa samtökin Age UK látið sig málið varða m.a. með auglýsingaherferð fyrir jólin sem vakti mikla athygli.

Tilraunaverkefnið er til átján mánaða og verða tveir háskólanemar í verkefninu til að byrja með. Verkefnið er hluti af stærra verkefni sem snýr að því að auka samskipti milli kynslóða og draga úr félagslegri einangrun eldra fólks. Það verður spennandi að fylgjast með framhaldinu.

 

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Blogg

Framboðsyfirlýsing

Kæru félagar !

Ég býð mig fram í 2. sæti í forvali Vinstri grænna í Reykjavík til borgarstjórnarkosninga sem fram fer þann 24. febrúar næstkomandi.

Undanfarið kjörtímabil hef ég gegnt ýmsum trúnaðarstörfum fyrir borgarstjórnarflokk Vinstri grænna sem og hreyfinguna í heild. Fyrst sem fulltrúi í menningar- og ferðamálaráði og velferðarráði en frá haustinu 2016 sem varaborgarfulltrúi. Ég gegni nú bæði formennsku í velferðarráði og mannréttindaráði borgarinnar og sinni ýmsum trúnaðarstörfum fyrir borgarstjórnarflokk VG sem og hreyfinguna í heild. Ég hef gegnt embætti ritara Vinstri grænna frá árinu 2015.

Velferðarmálin eru mér hugleikin sem og mannréttindi fólks í víðum skilningi. Kvenfrelsi, félagslegt réttlæti, mannréttindi og náttúruvernd í borg eru allt mikilvæg málefni sem eiga erindi við okkur öll.

Ég hef nú síðastliðið ár getað einbeitt mér að vinnu í þágu borgarbúa og tel mig eiga erindi til að gera það áfram næstu fjögur árin. Ég mun halda áfram að berjast fyrir því að allir borgarbúar fái lifað með reisn. Það gerum við með því að halda áfram að efla velferðarþjónustuna í víðum skilningu út frá mannréttindum allra. Mikilvæg skref hafa verið stigin til að efla félagslegt húsnæðiskerfi á yfirstandandi kjörtímabili en betur má ef duga skal.

Við þurfum að skapa gott umhverfi fyrir börn og barnafjölskyldur. Eflum faglegt starf skóla og tryggjum öllum aðgang að skóla- og frístundastarfi óháð efnahag. Raunveruleg náttúruvernd í borg snýst um að tryggja aðgang að hreinu vatni og hreinu andrúmslofti. Við þurfum að efla almenningssamgöngur og hlúa vel að umhverfinu, bæði á grænum svæðum og í borgarlandinu.

Við þurfum að efla raunverulegt íbúalýðræði og brúa bilið milli íbúa borgarinnar og kjörinna fulltrúa. Ég óska eftir stuðningi ykkar til að geta haldið þessu mikilvæga starfi áfram, fyrir okkur öll.

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Blogg, Fréttir

Ræða flutt við afhendingu styrkja mannréttindaráðs

Kæru gestir!

Mannréttindaráð Reykjavíkurborgar úthlutar ár hvert styrkjum til frjálsra félagasamtaka og einstaklinga. Markmið styrkjana ráðsins er að styrkja við sjálfsprottið starf og starfssemi frjálsra félagasamtaka á sviði mannréttinda.

Þau verkefni sem hljóta styrki eru æði fjölbreytt en öllum er þeim ætlað að stuðla að farsælli þróun borgarsamfélagsins, jafnræði borgarbúa og fjölbreytilegu mannlífi í borginni okkar. Auk þess er það hlutverk styrkja mannréttindaráðs að styðja við hvers konar starf sem vekur athygli á eða stendur vörð um mannréttindi borgarbúa.

Á liðnu ári var skyndistyrkjum mannréttindaráðs úthlutað í fyrsta sinn. Var þeim komið á til að bregðast við umsóknum vegna verkefna sem ekki er hægt að sjá fyrir eða skipuleggja í aðdraganda almennra styrkúthlutana. Skyndistyrkir eru því mikilvæg viðbót til að efla grasrótina á sviði mannréttindamála. Þannig er hægt að bregðast hratt og vel við oft ófyrirséðum viðburðum og efla grasrót til nýsköpunar á sviði mannréttindamála.

Ég vil að lokum óska styrkþegum innilega til hamingju og þakka þeim fyrir að stuðla að mannréttindum í okkar góðu borg. Til hamingju með daginn!

 

Deila:
  • Print
  • Facebook
  • Twitter
  • StumbleUpon

Leave a Comment

Filed under Ræður